Në fillim me ngrirjen e çmimeve, e tash me rritjen e TVSH-së për disa produkte, Qeveria për qëllim final e ka mbushjen e buxhetit shtetëror, e jo uljen e çmimeve për qytetarët, vlerëson drejtor ekzekutiv i Odës Ekonomike të Maqedonisë Veriperëndimore, Durim Zeqiri, duke shtuar se ato që e pësojnë janë kompanitë.
“Këtë e themi sepse nuk mund të ulen çmimet kur në kurriz të kompanive ngrihen çmimet, ndërkaq në anën tjetër rritet TVSh-ja, që i bie përsëri do të kemi çmime të rritura”, tha Durim Zeqiri, drejtor ekzekutiv OEMVP.
Ngrirja e çmimeve paralelisht me rritjen e TVSH-së, sipas Zeqirit, nuk ka të bëjë as me uljen e inflacionit.
“Nuk jemi kundërt mbushjes së arkës shtetërore, por jemi kundër kur arka mbushet në mënyrë të parregullt duke i penalizuar kompanitë e ndryshme, siç ishte me rasti me tatimin solidar”, dekalroi Durim Zeqiri, drejtor ekzekutiv OEMVP.
Këto masa, përfshirë edhe tatimi solidar, sipas Zeqirit, do ta nxisnin ekonominë gri, e që mund të rrezikojë edhe vendet e punës në sektorin privat.
“Si mund të tatohen ata, pastaj t’u rrezikohet vendi i punës e më pas çka, të bëjmë ndonjë masë për t’i mbështetur ata të papunë. Nuk është logjike. Ne duhet të promovojmë rritje të vendeve të punës, rritje ekonomike dhe zhvillim ekonomik. E mendoj që gjitha këto nuk i shërbejnë një iniciative e vizioni të tillë”, tha Durim Zeqiri, drejtor ekzekutiv OEMVP.
Duke folur për problemet me të cilat më shumë përballet biznesi në vend, Zeqiri përmendi likuiditetin dhe mungesën e fuqisë punëtore. Sektorët me më shumë mungesë punëtorësh janë industria e rëndë, ndërtimtaria dhe hotelieri-turizmi.
The post OEMVP për masat e Qeverisë: E mbushin arkën e shtetit, dëmtohen kompanitë dhe rrezikohen vendet e punës appeared first on Telegrafi.