Maqedonia e Veriut bën pjesë në shtetet me rrezik të ulët për paraqitje të tuberkulozit. Në shtatë – tetë vitet e fundit numri i pacientëve të rinj lëvizë prej 130 deri 160 në nivel vjetor. Vdekshmëria është prej gjashtë deri 15 pacientë në vit, u cek në konferencën e sotme për shtyp.
Drejtori i Institutit për sëmundje të mushkërive dhe tuberkulozit – Shkup, Dimitar Karkinski kumtoi se këtë vit në institut ka vetëm një pacient i vdekur nga tuberkulozi, por se grumbullohen të dhëna nga i tërë vendi.
“Mos mendoni se të sëmurët nga tuberkulozi janë disa të moshuar të cilët jetojnë në fshatrat malore. Përkundrazi, tuberkulozi paraqitet edhe tek të rinjtë edhe tek personat e qytetit”, nënvizoi Karkinski.
Sipas tij, është mirë që vendi bën pjesë në shtete me rrezik të ulët për paraqitje të kësaj sëmundjeje.
“Është e saktë se kemi raste aktive të tuberkulozit, kemi njerëz të cilët po mjekohen dhe për fat të keq, akoma do të ketë njerëz edhe më tej me tuberkuloz. Është mirë që Republika e Maqedonisë është në vende me rrezik të ulët të tuberkulozit – 10 në 100 mijë. Në atë grup jemi ne. Bëhet fjalë për sëmundje infektive ngjitëse. Kjo do të thotë se problemi nuk është vetëm për të sëmurin i cili e ka tuberkulozin, por ka edhe dimension tjetlr social”, sqaroi Karkinski.
Pulologia Zorica Nanoviq foli për atë se të sëmurët ankohen për kollitje, ndonjëherë me gjak, dobësim, humbje të apetitit dhe ajo që është karakteristike, djersitja gjatë natës.
The post Maqedonia e Veriut me rrezik të ulët për paraqitje të tuberkulozit appeared first on Telegrafi.
