Ministri i Arsimit dhe Shkencës në Maqedoninë e Veriut, Jeton Shaqiri, gjatë vizitës së tij në Londër, ku po mbahet Forumi Botëror i Arsimit, ka takuar sot një grup studentësh që studiojnë në institucionet prestigjioze britanike të arsimit të lartë me mbështetjen financiare të Ministrisë së Arsimit dhe Shkencës.
“Më vjen mirë që u takova me ju dhe që kemi mundësinë të diskutojmë përvojën tuaj në studimet në universitetet më të mira, për të cilën keni mbështetjen e plotë nga unë dhe nga Qeveria e Maqedonisë së Veriut. Besoj se njëri prej jush do të jetë Elon Musk i radhës, i cili do të mund të investojë me shumë sukses potencialin e tij në tregun tonë, i cili përveç suksesit personal, do të përdoret plotësisht për përparimin dhe promovimin e vendit tonë, për të përmirësuar edukimin, promovimin e ndërmarrësisë rinore dhe demokratizimin e mëtutjeshëm të vendit”, është shprehur Shaqiri.
Shaqiri, siç njofton Ministria e Arsimit dhe Shkencës, ka theksuar se plani i Qeverisë është që të vazhdojë përkrahja financiare për të rinjtë që dëshirojnë të studiojnë në ndonjë nga universitetet më të mira në botë.
Gjithsej nëntë studentë nga Maqedonia e Veriut studiojnë në Kings College, University College të Londrës dhe Imperial College London, me bursa të dhëna nga Ministria e Arsimit dhe Shkencës e Maqedonisë së Veriut, bursa këto të vlefshme për të gjithë studentët që arrijnë të regjistrohen në ciklin e parë, të dytë ose të tretë të studimeve, në ndonjërin ndër 100 universitetet më të mira në botë sipas renditjes së Shangait.
Takimin e ministrit me studentët e organizoi Ambasada e Maqedonisë së Veriut në Londër dhe ambasadorja Aleksandra Miovska, njoftuan nga Ministria e Arsimit dhe Shkencës.
The post Jeton Shaqiri takon në Londër bursistët nga Maqedonia që po vazhdojnë studimet jashtë vendit appeared first on Telegrafi.