Pas incidentit që ndodhi në aeroportin e Shkupit me presidenten e Kosovës, Vjosa Osmani, ka Reaguar Bashkimi Demokratik për Integrim ku thanë se dënojnë këtë skandal diplomatik ndaj presidentes Osmani dhe shtuan se kjo pasqyrë e shtetit të Maqedonisë ndaj qytetarëve dhe ndaj përfaqësuesve më të lartë të shtetit, duhet dënuar në formën më të ashpër.
“Bashkimi Demokratik për integrim dënon fuqishëm incidentin skandaloz diplomatik në aeroportin e Shkupit ndaj Presidentës së Republikës së Republikës së Kosovës, zonjës Vjosa Osmani.
Kjo pasqyrë e shtetit ndaj çdo qytetari, e në veçanti ndaj përfaqësuesve më të lartë të shtetit, e në këtë rast motrat dhe vëllezërit tanë nga Kosova, është e papranueshme dhe duhet dënuar në formën më të ashpër.
Involvimi i shefit të sigurimit të Kryetarit jolegjitim të Kuvendit Afrim Gashi në incident, duke e thelluar atë, pa pasur asnjë kompetencë, pa qenë të thirrur dhe pa të drejtë, është gjithashtu skandaloz dhe flet zëshëm për gjendjen e mjerueshme dhe vazale në të cilën është përfaqësimi jolegjitim shqiptar në qeverinë monoetnike.
Humbësit e zgjedhjeve presidenciale dhe parlamentare pranuan rolin e të nënshtruarit dhe servilit, vetëm për të qenë në pushtet për veten e tyre, duke lënë në mëshirën e OBRM-PDUKM-së, fatin e shqiptarëve në vend dhe në rajon.
Mungesa e legjitimitetit, por edhe e dijës dhe guximit, të bën të turpërohesh para qytetarëve dhe para motrave e vëllezërve në Kosovë e Shqipëri, por edhe në Vashington e Bruksel.
Mohimi i incidentit nga zëvendës ministri i punëve të brendshme, Astrit Iseni, involvimi i paligjshëm dhe anarkik i sigurimit personal të Gashit që nxiti incident edhe më të madh, nuk guxojnë të kalojnë pa përgjegjësi politike bashkë me përgjegjësinë ligjore të të gjithë të involvuarve në këtë skandal diplomatik”, thuhet në reagimin e BDI-së.
The post Incidenti në aeroportin e Shkupit, BDI: Mungesa e legjitimitetit, dijës dhe guximit, të bën të turpërohesh para motrave e vëllezërve në Kosovë e Shqipëri appeared first on Telegrafi.
