Që nga sot, Lublana ka një galeri të re arti. Me ekspozitën Echo | Koleksioni i Artit Bashkëkohor të NLB-së në Dialog, galeria e re MUZA, e cila funksionon nën kujdesin e NLB Banka, ka hapur zyrtarisht dyert për publikun. Koleksioni i Artit i NLB-së, i cili konsiderohet koleksioni më i madh privat i artit në Slloveni, tashmë është i hapur edhe për publikun e gjerë. MUZA prezanton jo vetëm vepra të artistëve sllovenë, por edhe të artistëve më të njohur të rajonit, duke e kthyer Lublanën në një qendër të artit bashkëkohor vizual të Evropës Juglindore.
Koleksioni i Artit të NLB-së, i cili në vitin 2017 u shpall si thesar kombëtar i Republikës së Sllovenisë, përmban mbi 2,000 vepra arti, duke e bërë atë koleksionin më të madh privat në vend. Në vitin 2023, Grupi NLB vendosi të rifillojë blerjen e veprave të artit, jo vetëm si një mbështetës i kulturës, por edhe si një partner aktiv dhe përkrahës i artit bashkëkohor në Evropën Juglindore. Për këtë arsye, koleksioni është rritur në një përmbledhje ndërkombëtare me një qasje të re konceptuale, e cila fokusohet te arti bashkëkohor. Gjatë dy viteve të fundit, Grupi NLB ka blerë vepra nga 19 artistë të brezit të mesëm dhe të ri nga tregjet e rajonit, të cilat janë pjesë e ekspozitës hapëse.
Galeria MUZA ndodhet në Rrugën Čopova 3 në qendër të Lublanës, aty ku është edhe Muzeu i Bankës Sllovene. Galeria është e hapur çdo ditë, përveç të hënave, nga 10:00 deri në 18:00.
Blaž Brodnjak, CEO i NLB-së, theksoi:
“Grupi NLB ka qenë tradicionalisht një përkrahës i rëndësishëm i kulturës dhe artit, jo vetëm në Slloveni, por edhe në rajon. Me hapjen e kësaj galerie, po shkruajmë një kapitull të ri duke sjellë vepra arti nga të gjitha tregjet ku operojmë, për një audiencë më të gjerë. Dëshirojmë që Galeria MUZA të shndërrohet në një qendër të artit bashkëkohor vizual të rajonit dhe, mbi të gjitha, të ndihmojë popujt e kësaj zone të njihen më mirë mes tyre përmes kulturës dhe artit, të lidhen dhe të jetojnë në harmoni. Prandaj, sot është një ditë e rëndësishme jo vetëm për Grupin NLB, por për të gjithë rajonin, që ne e quajmë shtëpinë tonë.”
Matko Mioč, Drejtor i MUZA, shtoi:
“Pallati i bukur bankar në stilin Art Nouveau, në Rrugën Čopova në qendër të Lublanës, do të shkëlqejë tani edhe më shumë. Muzeu i Bankës Sllovene, i cili funksionon në katin e parë që nga viti 2021, tani do të zgjerohet me një galeri unike dhe të sofistikuar estetikisht në katin e dytë dhe të tretë. Ky pallat po shndërrohet në një shtëpi të kulturës dhe një pikë takimi mes botës së biznesit dhe artit, duke lidhur Evropën Juglindore.”
Rreth MUZA
Instituti NLB MUZA menaxhon në mënyrë profesionale koleksionet e trashëgimisë kulturore të Bankës, duke i pasuruar ato me blerje të reja dhe duke i prezantuar për publikun e gjerë. Muzeu i Bankës Sllovene dhe Galeria MUZA në Čopova 3 ekspozojnë një koleksion objektesh bankare dhe një përzgjedhje të veprave nga Koleksioni i Artit të NLB-së.
Rreth ekspozitës hapëse Echo
Ekspozita prezantuese Echo | Koleksioni i Artit Bashkëkohor të NLB-së në Dialog përmban 70 vepra arti, përfshirë punime të sapoblera dhe dy vepra të komisionuara enkas për këtë ekspozitë. Ekspozita do të jetë e hapur deri më 8 shkurt 2026.
Të gjithë atyre që vizitojnë Lublanën, ju ftojmë me kënaqësi ta vizitoni ekspozitën!
The post Galeria MUZA në Lublanë – shtëpia e re e Koleksionit të Artit të NLB-së hap dyert për publikun appeared first on Telegrafi.
