AlternAtivA: Të mos vendoset orë policore për Bajram
Duke u gjendur në vigjilje të festës së madhe të Bajramit të Madh, duke e parë se piku i pandemisë tashmë ka rënë dukshëm, ndërsa besimtarët myslimanë janë treguar mjaft të përgjegjshëm në respektimin e rekomandimeve gjatë riteve fetare në xhami, AlternAtivA propozon që gjatë ditëve të festës së Bajramit të mos vendoset orë shtesë policore, në mënyrë që besimtarët të mund ta falin Bajramin nëpër xhami dhe të mund t’i bëjnë vizitat e festës gjatë ditës.
Gjithsesi për neve nuk ka asgjë më të rëndësishme se shëndeti i qytetarëve, por duke i vlerësuar edhe kërkesat e besimtarëve myslimanë, ky propozim i AlternAtivA-s i drejtohet Komisionit për Sëmundje Infektive që ta shqyrtojë atë, ndërsa pavarësisht qëndrimit përfundimtar të qeverisë, ne gjykojmë se tashmë janë pjekur kushtet që mos të ketë orë policore shtesë në këto ditë feste, në mënyrë që Bajrami të jetë jo vetëm kremtim fetar, por edhe ngadhënjim mbi virusin Covid-19.
