Presidenti ukrainas Volodymyr Zelensky, teksa iu drejtua kombit të tij këtë javë, la të kuptohet se është gati për të negociuar me Rusinë për herë të parë që kur Moska filloi pushtimin e saj në shkallë të plotë më shumë se dy vjet më parë.
Zelensky sugjeroi se Moska duhet të dërgojë një delegacion në samitin e ardhshëm të paqes që ai shpreson të mbajë në nëntor.
Rusia nuk ishte e ftuar në konferencën e mëparshme të paqes, të mbajtur në Zvicër muajin e kaluar, pasi Zelensky tha se çdo bisedim mund të ndodhë vetëm pas një tërheqjeje ruse nga Ukraina.
Përparimi që trupat ruse po bëjnë në Ukrainën lindore është ngadalësuar ndjeshëm që kur armët amerikane filluan të mbërrinin në vend në maj, por ai nuk është ndalur plotësisht. Rusia po fiton ende territor, megjithëse me një ritëm shumë më të ngadaltë, shkruan Vizion Plus.tv.
Në të njëjtën kohë, po lindin pyetje në lidhje me gatishmërinë e disa prej aleatëve më të afërt dhe më të rëndësishëm të Ukrainës, veçanërisht të Shteteve të Bashkuara dhe Gjermanisë, për t’i ndihmuar.
Duke folur me gazetarët të hënën, Zelensky tha se Ukraina nuk po merrte ndihmën e mjaftueshme perëndimore për të fituar luftën, duke theksuar se rezultati i saj do të përcaktohet përtej kufijve të Ukrainës.
“Jo gjithçka varet nga ne. Ne e dimë se cili do të ishte një fund i drejtë i luftës, por kjo nuk varet vetëm nga ne. Nuk varet vetëm nga njerëzit tanë dhe dëshira jonë, por edhe nga financat, nga armët, nga mbështetja politike, nga uniteti në BE, në NATO, në botë”, tha presidenti.
Kushtet e papranueshme
Presidenti rus Vladimir Putin ka përsëritur disa herë në muajt e fundit se ai do të ishte i gatshëm të negocionte me Ukrainën, megjithëse me kushte që mbeten plotësisht të papranueshme për Ukrainën dhe aleatët e saj perëndimorë.
Putin tha se Rusia do t’i jepte fund luftës së saj në Ukrainë nëse Kievi dorëzonte tërësinë e katër rajoneve të pretenduara nga Moska: Donetsk, Luhansk, Kherson dhe Zaporizhzhia.
Një pjesë e madhe e këtyre rajoneve mbeten nën kontrollin e Ukrainës, kështu që ai në thelb po i kërkon Ukrainës që të heqë dorë nga territori pa luftë.
Putin tha gjithashtu se çdo marrëveshje paqeje do të kërkonte që Ukraina të braktiste ofertën e saj për t’u anëtarësuar në NATO, shkruan Vizion Plus.tv.
Orysia Lutsevych, zëvendësdrejtoreshë e Programit për Rusinë dhe Eurazinë në Chatham House, tha se duke marrë parasysh kërkesat publike të Putinit, fjalët e Zelenskyt ka të ngjarë të nënkuptoheshin si një mesazh për pjesën tjetër të botës.
“Është edhe një sinjal për Rusinë dhe një sinjal për jugun global se Ukraina nuk është një lloj force penguese. Është e gatshme të ulet në tryezën e bisedimeve. Por kjo nuk mund të bëhet duke pranuar kushtet ruse, të cilat do të sillnin dhe kapitullimin e Ukrainës. Putini po kërkon kontrollin e rajoneve që ai nuk mund t’i pushtojë ushtarakisht”, tha ajo për CNN.
Pavarësisht se është dukshëm më e madhe dhe më e fortë se Ukraina, Rusia nuk ka arritur të përmbushë qëllimet e saj territoriale, edhe kur Kievi po merrte vetëm ndihmë të kufizuar nga Perëndimi. Përpjekja fillestare e Moskës për të marrë kryeqytetin përfundoi në një disfatë dhe linjat e frontit nuk kanë lëvizur ndjeshëm në më shumë se një vit./vizionplus.tv