Maqedonia e Veriut ka siguruar 4,680 dozat e para të vaksinës kundër covid 19, nga Serbia. Vetë presidenti Alexandër Vucic ishte i pranishëm në pikën kufitare Tabanovc për të dorëzuar kontigjentin e parë të produktit të blerë nga kompanitë Pfizer dhe Biontech.
ALEXANDER VUCIC, PRESIDENT I SERBISE
“Serbia nuk ka interes tjetër përveç se të tregojë miqësi me popullin dhe shtetin maqedonas. Kjo është dhurata më e zakonshme, për të cilën jemi të sigurt që do të na bënit edhe ju. Një mik i vërtetë është ai që ju ndihmon kur jeni në telashe. Shpresoj që vaksinat të jenë në dispozicion të mjekëve të që janë në radhët e para të përballjes me pandeminë”.
Në total Serbia do ti dhurojë Maqedonisë së veriut 8 mijë doza të vaksinës ndërsa kreu i shtetit bëri të ditur se edhe vende të tjera të rajonit do të ndihmohen. Ndërkohë kryeminstri, Zoran Zaev, e konsideroi ndihmën një akt të vërtetë miqësie.
ZORAN ZAEV, KRYEMINISTER, MAQEDONI E VERIUT
“Kjo ngjarje është rezultat i miqësisë dhe mbështetjes së ndërsjellë midis dy shteteve tona, si dhe mirëkuptimit me situatën në të cilën ndodhet e gjithë bota. Pakoja prej 4680 vaksinash, nga gjithsej 8,000, është shprehje e një dore miqësore dhe ndihme për qytetarët maqedonas derisa të vijnë vaksinat që kemi porositur”.
Edhe Bullgaria premtoi një donacion prej rreth 5 mijë vaksinash por ato nuk kanë mundur ende të arrijnë për shkak të pengesave teknike. Maqedonia e Veriut është në pritje edhe të 200 mijë vaksinave nga Kina.
