Tre ushtarë izraelitë dhe një oficer sigurie egjiptian, u vranë të shtunën pranë kufirit mes dy vendeve. Autoritetet izraelite dhe egjiptiane thanë se po hetonin së bashku rreth incidentit, detajet e të cilit mbetën të paqarta.
Ushtria izraelite njoftoi fillimisht se një polic egjiptian kishte qëlluar për vdekje dy nga ushtarët e saj. Incidenti ndodhi pasi forcat izraelite arritën të pengonin me sukses një përpjekje për kontrabandë gjatë natës, në kufi.
Në deklaratë thuhej se oficeri egjiptian dhe një ushtar i tretë izraelit, u vranë disa orë më vonë, në një konfrontim brenda territorit izraelit.
Ushtria izraelite e trajtoi incidentin si një sulm terrorist.
Ushtria egjiptiane tha se tre ushtarë izraelite dhe një egjiptian ishin vrarë në një shkëmbim zjarri ndërsa oficeri egjiptian i sigurisë, ishte duke ndjekur kontrabandistët përtej kufirit.
Zyrtarët egjiptianë dhe izraelitë po hetojnë rrethanat e incidentit në bashkëpunim të plotë, njoftoi ushtria izraelite dhe dy burime egjiptiane të sigurisë.
“Incidenti fatal në kufirin egjiptian gjatë Shabatit është serioz dhe i pazakontë dhe do të hetohet tërësisht”, tha Kryeministri izraelit Benjamin Netanyahu në një deklaratë.
Ushtria izraelite tha se ishte e paqartë se si oficeri egjiptian kishte kaluar gardhin kufitar.
Një zëdhënës i ushtrisë izraelite tha se dy ushtarë ishin qëlluar ndërsa po kryenin detyrën në një zonë relativisht të shkretë përgjatë kufirit me Egjiptin të shtunën në mëngjes. Trupat e tyre u gjetën më vonë.
Në vitin 1979 Egjipti u bë vendi i parë arab që nënshkroi një traktat paqeje me Izraelin dhe kufiri prej më shumë se 200 kilometrash mes dy vendeve ka qenë kryesisht i qetë./voa