Pas Britanisë së Madhe, Argjentinës dhe El Salvador, vaksina e universitetit të Oxfordit është autorizuar për përdorim emergjent edhe në Indi. Vendi i dytë më i populluar në botë, pritet të fillojë një program masiv të imunizimit brenda një jave.
Rregullatori i barnave në Indi e përcaktoi efektshmërinë e vaksinës së Astrazenecas në vlerën 70.42%, ndërsa në Europë pritet që vaksina kandidate të autorizohet më 6 janar edhe pse Agjensia Europiane e barnave nuk e ka kursyer skepticizmin duke argumentuar se nevojiten më shumë prova shkencore.
Ndërkohë në Britaninë e Madhe, shkencëtari që drejton programin e vaksinimit ka deklaruar se duhet zgjatur hendeku midis dy dozave, duke këmbëngulur se është më efektive. Profesori Jonathan Van-Tam është shprehur se pritja 12 javë midis dy injeksioneve në vend të tre që janë kërkuar aktualisht, do të mbrojë ata që janë më të rrezikuar nga Covid-19. Ekspertët britanikë bëjnë thirrje që dozat e para të vaksinës të injektohen në sa më shumë njerëz, në kohën më të shkurtër të mundshme.
Deri më tani, Izraeli është vendi i parë në botë që ka vaksinuar më shumë se një të dhjetën e popullsisë në më pak se dy javë pas fillimit të fushatës së vaksinimit me produktin e kompanive Pfizer dhe BioNTech.