Policia bjelloruse ka arrestuar dhjetëra protestues gjatë marshit të 27 shtatorit në Minsk, të organizuar kundër Aleksander Lukashenkos dhe autoritetet e rendit në Gomel ka përdorur gaz lotsjellës kundër protestuesve.
Protestat kundër Lukashenkos, që pretendon se ka fituar në zgjedhjet presidenciale të 9 gushtit, kanë hyrë në ditën e 50 me radhë.
Protestat në Minsk, Gomel dhe në qytete tjera vijnë pasi Lukashenko – që është në pushtet që prej vitit 1994 – u inaugurua në një ceremoni sekrete më 23 shtator, që nxiti reagimin e Shteteve të Bashkuara dhe Bashkimit Evropian që thanë se nuk do ta njohin legjitimitetin e tij.
Një zëdhënës i Komitetit për Marrëdhënie të Brendshme në Gomel tha se u përdor gaz lotsjellës ndaj protestuesve “sepse disa njerëz u sollën në mënyrë të papërshtatshme”.
Dhjetëra-mijëra persona, të cilët valëvitnin flamuj opozitar me ngjyrë të kuqe dhe të bardhë, marshuan në rrugët e Minskut.
Protestuesit planifikonin të mbanin një ceremoni “inauguruese për popullin” në mbështetje të Svyatlana Tsikhanouskaya, kandidates opozitare në zgjedhjet presidenciale, e cila tashmë është larguar nga vendi dhe po qëndron në Lituani.
Tsikhanouskaya ka thënë se ajo në zgjedhjet e 9 gushtit ka fituar 60 apo 70 për qind të votave. Ajo u ka bërë thirrje bjellorusëve që të protestojnë për një “qëllim të ri, për zgjedhje të ndershme, që do të rezultonin në një inaugurim zyrtar dhe të ligjshëm”.
Në protestën e sotme në Minsk, dhjetëra protestues janë marrë me forcë nga policia dhe janë futur në furgonat e forcave të rendit.
Protesta po mbahen edhe në qytete të tjera bjelloruse, përfshirë edhe në Mogilev, Hrodna dhe Lida.
Protestat e 27 shtatorit po mbahen pasi një ditë më parë, gjatë një marshi të grave në Minsk u arrestuan mbi 100 protestues.
Protestuesit në Bjellorusi për të shtatën javë me radhë po kërkojnë që Lukashenka të largohet nga pushteti dhe të mbahen zgjedhje të reja. Që prej se kanë nisur protestat, Policia bjelloruse ka arrestuar rreth 12,000 persona dhe ka pasur të dhëna se protestuesit janë rrahur dhe torturuar./REL
The post Vazhdojnë protestat kundër Lukashenkos appeared first on Vizion Plus.
