Presidenti i Shteteve të Bashkuara, Donald Trump, tha se do të shtyjë Samitin G7 të planifikuar për këtë vit, me qëllim që të ftojë edhe liderët e shteteve tjera që nuk janë pjesë e G7-ës.
“Nuk mendoj se përfaqëson në mënyrë të duhur atë çfarë po ndodh në botë. Është një grup i vjetër i shteteve”, deklaroi ai. Grupi G7, mikpritës i të cilit do të jetë SHBA këtë vit, përbëhet nga Kanadaja, Franca, Gjermania, Italia, Japonia dhe Britania.
Trump tha se Rusia, Koreja e Jugut dhe Australia e India duhet të ftohen gjithashtu. Për këtë qëllim, ka vendosur ta shtyjë deri në shtator samitin e parashikuar muajin që po hyn.
Kancelarja gjermane, Angela Merkel e refuzoi ftesën e presidentit amerikan për të marrë pjesë në takimin e shtatë ekonomive më të avancuara në botë.
“Marrë parasysh situatën me pandeminë, ajo nuk është pajtuar për pjesëmarrje personale dhe udhëtim drejt Uashingtonit. Ajo natyrisht se do të vazhdojë të vëzhgojë zhvillimet rreth sëmundjes”, ka thënë zëdhënësi i qeverisë gjermane.