Një tjetër rast “Floyd” është regjistruar në Shtetet e Bashkuara të Amerikës, ku një 27-vjeçar afro-amerikan, i quajtur Rayshard Brooks është vrarë nga policia e Atlantës gjatë arrestimit. Agjentët mbërritën në vendngjarje pasi morën një telefonatë nga ana e një restoranti për një person të dyshimtë që flinte në parking.
Personi ishte në gjendje të dehur dhe në momentin kur do i vendoseshin prangat u rebelua. Në atë çast një nga efektivët e qëlloi. Sipas të dhënave të dy efektivët janë pezulluar nga detyra për këtë ngjarje deri në përfundimin e hetimeve. Në videon e publikuar shihet 27 vjeçari Brooks që tenton të largohet nga efektivë duke i marrë njërit prej tyre armën paralizuese.
Në këtë momenti efektivët qëllojnë dhe ai merr 3 plumba mbrapa shpine. Vrasja shkaktoi revolta në Atlanta. Manifestuesit i vunë flakën fast foodit, ndërsa u përleshën me policinë. Shefja e policisë lokale Erika Shields njoftoi dorëheqjen.
Autoritetet i dolën në mbrojtje efektivit që qëlloi ndaj afro-amerikanit, duke thënë se para se t’a qëllonin ai ishte kthyer për t’i sulmuar me shokuesin elektrik. Ndërsa avokatët e viktimës thanë se vrasja ishte akt i tepruar. Protestat anti-racizëm vijojnë të jenë intensive në gjithë Shtetet e Bashkuara.
