Rusia nisi një sulm masiv me raketa gjatë natës në qytetin qendror të Ukrainës, Krivi Rih, duke vrarë të paktën tre persona dhe plagosur 25 të tjerë dhe duke dëmtuar infrastrukturën civile, thanë zyrtarët ukrainas të martën në mëngjes.
“Ka të vdekur dhe të plagosur”, tha Serhiy Lisak, guvernator i rajonit të Dnipropetrovsk ku ndodhet Krivi Rih.
“Ndodhi një sulm masiv raketor në Krivi Rih”, shkroi ai në Telegram.
Gjatë orëve të para të së martës, sirenat e sulmit ajror u ndezën në të gjithë Ukrainën, ndërsa zyrtarët ushtarakë të Kievit që thanë se forcat e mbrojtjes ajrore shkatërruan të gjitha raketat ruse që synonin kryeqytetin ukrainas.
Komanda e lartë ushtarake e Ukrainës tha se forcat ajrore shkatërruan 10 nga 14 raketat që Rusia lëshoi në Ukrainë dhe një nga katër dronët e prodhuar nga Irani.
Nuk ishte menjëherë e qartë se sa raketa goditën qytetin Krivi Rih.
Në këtë qytet, disa ndërtesa civile u goditën, duke përfshirë një ndërtesë pesë-katëshe, tha më herët kryebashkiaku i qytetit, Oleksandr Vilkul.
“Me gjasë ka njerëz nën rrënoja”, tha Vilkul në Telegram por nuk dha detaje tjera.
Lisak postoi një fotografi të një ndërtese apartamentesh pesëkatëshe me të gjitha dritaret e thyera dhe tym që dilte nga disa prej tyre.
Nuk kishte asnjë koment të menjëhershëm nga Rusia në lidhje me sulmet e raportuara.
Rusia nuk ka komentuar ende këto sulme. Si Rusia, ashtu edhe Ukraina, kanë hedhur poshtë akuzat për sulmin e qëllimshëm të civilëve gjatë konfliktit të nisur nga Rusia kundër vendit të saj fqinj rreth 16 muaj më parë.
Kryetari i qytetit të Harkivit në lindje të Ukrainës tha në kanalin e tij në Telegram se dronët rusë goditën infrastrukturën civile atje, duke goditur një magazinë dhe një ndërtesë të një firme shërbimi.
Nuk kishte asnjë informacion të menjëhershëm për viktima në këtë qytet./rel
