Evropa duhet të përgatitet për të paktën 10 vjet luftë në Ukrainë, ka paralajmëruar Sekretari i Përgjithshëm i NATO-s në largim, Jens Stoltenberg, duke folur për BBC.
Stoltenberg tha se sa më shumë aleanca ushtarake perëndimore të angazhohet për luftën, aq më shpejt do të arrihet një zgjidhje.
Stoltenberg, i cili përfundon mandatin e tij 10-vjeçar si sekretar i përgjithshëm në tetor, u kërkoi anëtarëve evropianë të NATO-s të rritin angazhimet e tyre mes frikës se burimet amerikane mund të shkurtohen, apo edhe të ndalohen, nëse Donald Trump fiton një mandat të dytë si president i SHBA në nëntor.
“Aleatët duhet të jenë të përgatitur”
I pyetur nëse aleatët e NATO-s duhet të përgatiten për një konflikt në Ukrainë pas më shumë se 10 vjetësh, Stoltenberg u përgjigj: “Po”.
Ai shtoi: “Por mesazhi kryesor është se sa më e fortë të jetë mbështetja për Ukrainën dhe sa më shumë të jemi të gatshëm të angazhohemi, aq më shpejt mund të përfundojë lufta”.
NATO ka njoftuar se një njësi komanduese për të koordinuar mbështetjen për Ukrainën do të operojë në Gjermani nga shtatori.
“Kjo do të ofrojë më shumë mbështetje dhe gjithashtu do të demonstrojë angazhimin tonë të vazhdueshëm për të mbështetur Ukrainën,” tha Stoltenberg.
“Koha për t’u ngritur për lirinë dhe demokracinë është tani, dhe vendi është Ukraina.”
Komentet e Stoltenberg vijnë pasi Gjermania njoftoi planet për të përgjysmuar ndihmën ushtarake për Ukrainën vitin e ardhshëm, nga 8 miliardë euro në rreth 4 miliardë euro. Ulja e planifikuar e ndihmës vjen mes frikës në Ukrainë dhe midis aleatëve të saj evropianë se financimi i SHBA-së mund të shterohet gjatë një mandati të dytë të mundshëm të Trump.
Stoltenberg tha se ishte i bindur se SHBA-të do të mbeten në aleancë, sepse “është në interesin e sigurisë së SHBA-së që të ketë një NATO të fortë”.
Ekziston gjithashtu “mbështetje e fortë dypartiake për NATO-n në Shtetet e Bashkuara, si në Kongres ashtu edhe në sondazhe,” argumentoi ai.
I pyetur nëse një mandat i dytë i Trump mund të nënkuptojë financim më të ulët për NATO-n, Stoltenberg tha: “Gjëja e duhur për të bërë pavarësisht se çfarë mendoni për angazhimin e SHBA-së ndaj NATO-s është të investojmë më shumë në mbrojtjen tonë.”
“Para së gjithash, rrit gjasat që SHBA të mbeten një aleat i fortë. Së dyti, nëse ndodh diçka vërtet e keqe, atëherë është mirë të kemi aftësi më të forta mbrojtëse evropiane dhe kanadeze”./vizionplus.tv