Kosova përballet sot në mbrëmje me një kundërshtar të fortë në letër si Spanja. Një sfidë që shkaktoi një sërë polemikash që në momentin që dy skuadrat mësuan se do të ishin përballë njëra-tjetrës. Diçka e tillë u pa që në konferencën për shtyp që dardanët kishin organizuar në Pragë të sfidë. Një ngjarje e pazakontë dhe aspak europiane kur gazetarët spanjollë nuk pranonin t’i përmendnin dhe emrin shtetit të Kosovës duke e quajtur atë federata e futbollit të Kosovës.
Menaxheri i Dardanëve, Bajram Shala debatoi me gazetarin e medias së njohur AS, për shkak se nuk e përmendte në asnjë moment emrin e Kosovës duke ndjekur linjën editoriale të medias së tij për mosnjohjen e këtij shteti. Në këtë formë, zyrtari i Kosovës, këmbënguli që gazetari ta përmendte emrin, ndërsa edhe pse mori disa minuta, në fund gazetari u dorëzua. Një lajm që bëri bujë jo vetëm në mediat kombëtare por në të gjithë Europën.
Pas kësaj , reagim të menjëhershëm ka pasur dhe në Katalonjë, e cila ndodhet pothuajse në situatë të njëjtë si Kosova. Katalanasit kanë kërkuar pavarësinë nga Spanja, ndërsa këta të fundit nuk e pranojnë në asnjë mënyrë. Kështu, duke e ditur vështirësinë e Kosovës, në Katalonjë organizuan një protestë në mbështetje të shqiptarëve duke theksuar nevojën për të mbrojtur dinjitetin dhe Republikën e Pavarur të Kosovës.
Ndërkohë sikur të mos mjaftohej me kaq një nga mediat e njohur spanjolle si Marka ka shkruar se dueli Spanjë-Kosovë do të jetë një sfidë edhe për komentatorët të cilët nuk duhet ti referohen rivalit të tyre me emrin e Kosovës. E njëjta gjë është dhe televizionet që do e transmetojnë sfidën duke mos lejuar për asnjë moment shfaqjen e flamurit të Kosovës apo dëgjimin e himnit. Ndërsa Federata spanjolle e futbollit është dorëzuar orët e fundit pasi e ka njohur Kosovën si rival duke valvitur flamurin kosovar mbi stadiumin olimpik të Sevijës. Sfida Spanjë -Kosovë do të luhet sot në mbrëmje në orën 20:45.
