![Shpërthim me bombë në Kandahar, të paktën 37 të vdekur](https://www.vizionplus.tv/wp-content/uploads/2021/10/shperthim-679x400.png)
Të paktën 37 persona humbën jetën dhe mbi 70 u plagosën si pasojë e një shpërthimi me bombë në një xhami shiite në qytetin e Kandaharit në Afganistan. Shpërthimi ndodhi ndërsa po mbaheshin lutjet e së premtes pasdite.
Duke iu referuar zyrtarëve lokalë, mediat afgane njoftuan se gjatë shpërthimit u vranë të paktën 37 persona dhe u plagosën mbi 70 të tjerë, ndërsa ekzistojnë mundësitë që numri i viktimave të rritet.
Zyrtarët talebanë konfirmuan shpërthimin, por nuk thanë asgjë rreth viktimave.
Nuk ka informacione nëse shpërthimi ishte akt i ndonjë autori sulmi vetëvrasës. Deri tani asnjë grup nuk ka marrë përgjegjësinë mbi aktin.
Të premten e kaluar, gjatë një shpërthimi të fuqishëm vetëvrasës në një xhami shiite në Kunduz, një qytet në verilindje të vendit, u vranë të paktën 150 besimtarë dhe u plagosën shumë të tjerë.
Shteti Islamik në provincën Khorasan (IS-Khorasan), degë e Shtetit Islamik në Afganistan, mori përgjegjësinë për sulmit në Kunduz dhe paralajmëroi për të tjera akte të dhunshme./VOA