Pavarësisht se Moska mohon të ketë plane për të sulmuar Ukrainën, Shtetet e Bashkuara vazhdojnë të mos e përjashtojnë mundësinë e një skenari të tillë.
Shtetet e Bashkuara i kanë kërkuar Japonisë nëse mund të dërgojë një pjesë të LNG-së në Evropë nëse kriza e Ukrainës çon në një ndërprerje të furnizimeve, i thanë Reuters burime të qeverisë japoneze.
Tokio u shpreh se do të shqyrtojë se si mund të ndihmojë. Japonia është importues kryesor i gazit natyror të lëngshëm (LNG), por së pari duhet të sigurohet për furnizime të mjaftueshme vendase përpara se të ofrojë ndihmë ndërkombëtare, tha Ministri i Industrisë Koichi Hagiuda.
Katër burime qeveritare konfirmuan kërkesën e SHBA-së, një duke thënë se ajo erdhi në fillim të javës. Në një konferencë shtypi më herët Hagiuda tha se Japonia ka qenë një “forcë lëvizëse në zhvillimin e tregut të LNG” për dekada te tera. “Ne do të donim të konsideronim se si mund të kontribuojmë në komunitetin ndërkombëtar”, tha ai.
Por me të ftohtin që nuk është larguar ende, Japonia e varfër me burime do të duhet të sigurojë së pari furnizimet e saj të brendshme.
“Ne do të shohim nëse ka ndonjë gjë që mund të bëhet pasi të sigurohemi që jetët e njerëzve të mos preken,” tha ai.
Situata në Ukrainë pati një ndikim të rëndësishëm në furnizimin e qëndrueshëm të energjisë në Japoni, kështu që Japonia do të monitorojë nga afër situatën, shtoi zyrtari.
Rusia dhe Perëndimi kanë qenë në mosmarrëveshje për Ukrainën, duke nxitur frikën se furnizimet me energji në Evropë mund të ndërpriten.
Javën e kaluar, Shtetet e Bashkuara, prodhuesi më i madh në botë i gazit natyror, i kërkoi Katarit dhe prodhuesve të tjerë të mëdhenj të energjisë që të shqyrtonin nëse mund të furnizonin Evropën nëse Rusia do të shkurtonte furnizimet si rezultat i krizës në Ukrainë.
