Mediat e huaja raportojnë se presidenti, Vladimir Putin ka arritur në Korenë e Veriut, teksa dy shtetet synojnë të thellojnë bashkëpunimin që po vëzhgohet nga afër prej Shteteve të Bashkuara.
Kjo është vizita e parë e Putinit në Korenë e Veriut pas 24 vjetëve. Putin është pritur në Aeroportin e Phenianit prej liderit verikorean, Kim Jong Un.
Agjencia e lajmeve Interfax njoftoi se vizita me ftesë të liderit të Koresë së Veriut Kim Jong Un nënvizon marrëdhëniet në rritje të Moskës me shtetin e armatosur bërthamor që nga pushtimi i Ukrainës nga Rusia.
Putin lëshoi një urdhër presidencial në prag të vizitës duke thënë se Moska po kërkon të nënshkruajë një “traktat gjithëpërfshirës të partneritetit strategjik” me Korenë e Veriut, për të cilin ndihmësi i tij për politikën e jashtme Yuri Ushakov tha se do të përfshinte bashkëpunimin e sigurisë.