Njëqind e katër gazetarë u vranë në mbarë botën, më shumë se gjysma e tyre në Rripin e Gazës, sipas të dhënave të publikuara nga Federata Ndërkombëtare e Gazetarëve.
Pas 129 vdekjeve të vitit 2023, “2024 është një nga vitet më të këqija”, tha Anthony Belanger, Sekretari i Përgjithshëm i ILO-s me qendër në Bruksel.
Kreu i Federatës denoncoi “kasaphanën që po bëhet para syve të gjithë botës në Palestinë”.
Sipas ILO-s, në vitin 2024 u vranë 55 profesionistë palestinezë të medias.
“Që nga shpërthimi i luftës midis Izraelit dhe Hamasit më 7 tetor 2023, numri i gazetarëve palestinezë që janë vrarë është të paktën 138, që do të thotë se ky rajon është një nga më të rrezikshmit në historinë e tij moderne të gazetarisë, duke tejkaluar Irakun, Filipinet dhe Meksikën”, nënvizon Federata.
“Shumë nga gazetarët u shënjestruan” qëllimisht, tha Anthony Bélanger për AFP, duke shtuar se të tjerët u vranë si rezultat i ngjarjeve “në kontekstin e luftës” sepse ata ishin “në vendin e gabuar në kohën e gabuar”.
Zona më e rrezikshme në botë
Pas Lindjes së Mesme, rajoni më i rrezikshëm i botës për gazetarët është rajoni i Azi-Paqësorit, me 20 vdekje, përfshirë 6 vrasje në Pakistan, 5 në Bangladesh dhe 3 në Indi.
Në Evropë, “lufta në Ukrainë vazhdon të ketë pasoja, me 4 gazetarë të vrarë në 2024, nga 13 në 2022 dhe 4 në 2023”.
ILO numëron gjithashtu 520 gazetarë në burg në mbarë botën, një numër shqetësues i lartë krahasuar me 2023 (427) dhe 2022 (375).
“Me 135 gazetarë pas hekurave, Kina, përfshirë Hong Kongun, ka numrin më të madh të profesionistëve të medias të burgosur”, tha Federata.
Reagimet ndërkombëtare
Përballë këtyre shifrave tragjike, përgjigja duhet të jetë ndërkombëtare dhe e pilotuar nga OKB-ja, sipas Belanger, i cili i kërkon organizatës të mobilizohet për të miratuar ligjërisht një “konventë detyruese për sigurinë e gazetarëve”.
Federata Ndërkombëtare e Gazetarëve publikon çdo vit një raport që zakonisht është më i rëndë se ai i organizatës joqeveritare Reporterët pa Kufi (RSF), për shkak të një mospërputhjeje në metodën e llogaritjes.
Në vitin 2023, RSF numëroi 54 vdekje të gazetarëve dhe 2 partnerëve të tjerë mediatikë gjatë kryerjes së detyrave të tyre. RSF pritet të publikojë raportin e vet për vitin 2024 pasnesër, të enjten./vizionplus.tv
