Keqmenaxhimi i krizës që ndodhi në Afganistan, një muaj më parë, ka sjellë dorëheqjen e ministres se jashtme holandeze. Sigrid Kaag akuzohet se nuk ka kryer në kohë evakuimet e bashkëpunëtorëve të ushtrisë holandeze në Afganistan.
Ajo është zyrtarja e parë perëndimore që tërhiqet, si pasojë e kaosit që ndodhi pasi militantët talibanë morën nën kontroll Afganistanin, më 15 Gusht.
Deputetët holandezë miratuan një mocion ndaj saj, duke thënë se q ishte shumë e ngadalshme në përgjigje dhe se la pas shumë afganë që duhej të iknin. Holanda arriti të evakuojë rreth 2,000 njerëz nga Afganistani në dy javët e fundit të Gushtit.
Por qindra afganë që kanë punuar me trupat holandeze, u lanë atje. Ministrja pranoi se qeveria holandeze ka vepruar në bazë të “supozimeve të gabuara”, por tha se ngritja e shpejtë e talibanëve në pushtet i ka habitur të gjithë, “përfshirë edhe vetë talibanët”.