Koreja e Veriut lëshoi dy raketa balistike të dyshuara me rreze të shkurtër veprimi në drejtim të lindjes nga aeroporti Sunan i Penianit, në atë që është shfaqja e katërt e forcës që nga fillimi i vitit. Të parat u zhvilluan më 5 dhe 11 janar dhe pretendohet se janë kryer me raketa hipersonike.
Komanda e Shtabit të Përbashkët të Koresë së Jugut, duke dhënë përditësimin për numrin e “plumbave të paidentifikuar”, shpjegoi se “aktualisht, ushtria jonë po monitoron dhe kontrollon lëvizjet përkatëse të Koresë së Veriut, duke mbajtur një pozicion gatishmërie”.
Lëshimi i fundit erdhi vetëm tri ditë, pasi Veriu lëshoi dy raketa të dyshuara balistike me rreze të shkurtër veprimi në Detin e Japonisë, duke shpjeguar se donte të testonte “raketat që niseshin nga një tren” në një stërvitje të regjimentit hekurudhor. Lëvizja e sotme, sipas vëzhguesve, synon të nënvizojë aftësitë e Penianit për të lëshuar raketa nga platforma të ndryshme, duke përfshirë trenat, strukturat detare dhe tokësore.
Javën e kaluar, Korja e Veriut paralajmëroi SHBA-në për një “reagim më të fortë dhe më vendimtar” pas vendosjes së sanksioneve të reja nga Thesari i SHBA-së ndaj gjashtë koreano-veriorëve të përfshirë në armët e shkatërrimit në masë të regjimit dhe programet e raketave balistike, duke rritur tensionet në mes të ngërçit të negociatave bërthamore me Shtetet e Bashkuara.
Seuli përsëriti zhgënjimin e tij për iniciativat mbi paralelen e 38-të, ndërsa ministri i Jashtëm japonez Yoshimasa Hayashi u ankua për lëshimet e përsëritura të raketave balistike nga Koreja e Veriut, duke i quajtur ato “jashtëzakonisht të mjerueshme”.
