“Kasapi i Bucha”/ Ky është komandanti që udhëhoqi forcat ruse në qytetin e masakruar

Identifikohet komandanti rus që qëndron pas mizorive në Bucha, një qytet në periferi të kryeqytetit ukrainas.

Nënkoloneli Azatbek Omurbekov, i njohur si “kasapi i Buchas”, mesa duket është personi përgjegjës në anën e ushtrisë ruse, që urdhëroi trupat të qëllojnë mbi civilët e pafajshëm.

Omurbekov është komandant i Brigadës së 64-të të përfshirë në pushtimin e Bucha, i cili u mbajt i pushtuar nga ushtria ruse deri javën e kaluar.

Omurbekov, një ushtarak rreth 40 vjeç, i dekoruar nga Ministria e Mbrojtjes në Rusi në vitin 2014 për shërbimet e jashtëzakonshme të tij, tani akuzohet për organizimin e përdhunimit, plaçkitjes dhe vrasjes së pretenduar të qindra civilëve ukrainas gjatë tërheqjes nga Bucha.