Protestuesit sulmuan një burg në Bangladeshin qendror dhe liruan të burgosurit sot, ndërsa lëvizja studentore që u shndërrua në një përplasje me qeverinë vazhdoi në ditën e saj të 19-të.
Sipas një raporti të AFP-së bazuar në burime spitalore, të paktën 100 njerëz janë vrarë në dhunën që ka tronditur vendin prej 170 milionë banorësh ditët e fundit, në mes të papunësisë së lartë të të diplomuarve. Komisioneri i Lartë i OKB-së për të Drejtat e Njeriut Volker Turk dënoi goditjen, duke i quajtur sulmet ndaj protestuesve studentorë “tronditëse dhe të papranueshme”.
“Protestat janë të mëdha , është ndoshta sfida më serioze me të cilën përballet kryeministri Sheikh Hasina, i cili ka drejtuar vendin që nga viti 2009,” tha Pierre Prakas, drejtori i Grupit të Krizave në Azi me bazë në Bangkok.
Autoritetet u përgjigjën duke ndaluar të gjitha mitingjet, marshimet dhe takimet publike në Daka , kryeqyteti, sot. Në fillim të javës janë mbyllur të gjitha shkollat dhe universitetet, ndërsa nga dita e djeshme është ndërprerë lidhja e internetit . Policia njoftoi gjithashtu arrestimin e një politikani të opozitës, Ruhul Kabir Rizvi Ahmed, një zyrtar i Partisë Nacionaliste të Bangladeshit (BNP) me arsyetimin se ai ishte “i përfshirë në disa raste”.
Pavarësisht goditjes, demonstratat vazhduan në të gjithë vendin. Në rrethin Narsingdi, protestuesit sulmuan një burg. “Të burgosurit u arratisën dhe protestuesit i vunë flakën,” tha një oficer policie, duke shtuar se “qindra” të burgosur u liruan . Musumi Sarker, një zyrtar i lartë lokal, konfirmoi se protestuesit kishin hyrë në burg, pa dhënë detaje të mëtejshme. Përleshjet shpërthyen gjithashtu kur studentët dolën përsëri në rrugë, përpara demonstratave pro-qeveritare të planifikuara për pas lutjeve të mëngjesit./vizionplus.tv