Gjatë karantimit prej mbylljes nga koronavirusi, në shumë vende të botës u përhap praktika e jogës, tashmë tepër në modë, e këshilluar në median sociale për t’u relaksuar gjatë periudhës së pandemisë.
Por, Kisha Ortodokse në Greqi, e shqetësuar për përhapjen e disiplinës indiane, ka ndërhyrë fuqishëm mbi këtë çështje: “Joga është absolutisht e papajtueshme me besimin tonë dhe nuk ka hapësirë në jetën e të krishterëve”, afirmoi Sinodi i Shenjtë.
“Ashtë një aspekt themelor i fesë hindu, nuk është thjesht një ushtrim fizik”, saktësoi Sinodi, duke shtuar se kishte vendosur të ndërhynte pasi media të ndryshme rekomanduan jogën si një mjet për të luftuar stresin gjatë pandemisë së Covid-19.
Kisha Ortodokse, një ndër institucionet më të fuqishme në Greqi, ka një ndikim të fortë në politikë dhe në shumë aspekte të jetës sociale dhe në fillim të pandemisë ngjalli polemika, duke pretenduar se koronavirusi nuk përhapet përmes procesit të kungimit.
