Ilir Meta zhvilloi sot një bashkëbisedim, nëpërmjet një video-konference, me përfaqësuesit e “Europa Nostra”, zëvendëspresidentin ekzekutiv, Guy Clausse, sekretaren e Përgjithshme, Sneska Quaedvlieg-Michailovic dhe anëtarin e bordit, profesor Paolo Vitti.
Meta i ka falenderuar ata për angazhimin dhe vëmendjen që “Europa Nostra” ka treguar ndaj promovimit dhe ruajtjes së trashëgimisë kulturore dhe historike të vendit tonë.
Meta është ndalur edhe në çështjen e Teatrit dhe ka falenderuar organizatën për mbështetjen që i ka dhënë “Aleancës për Mbrojtjen e Teatrit”.
Nga zyra e shtypit e Presidencës bëhet e ditur se Meta ka theksuar gjatë video-konferencës se shembja e paligjshme e teatrit është edhe një çështje europiane përveç asaj kushtetuese, e trashëgimisë historike dhe identitetit kombëtar.
Prandaj mes palëve është rënë dakord për domosdoshmërinë e nisjes së një hetimi ndërkombëtar mbi këtë çështje dhe informimin e mëtejshëm të niveleve më të larta europiane.
“Europa nuk është vetëm euro, por edhe kulturë, solidaritet, humanizëm dhe identitet. Teatri Kombëtar ishte dëshmori i parë i Bulevardit ‘Dëshmorët e Kombit’, por demokracia dhe kultura europiane do fitojë”, mësohet të jetë shprehur ndër të tjera anëtari i bordit të “Europa Nostra”, profesor Paolo Vitti.
“Nga sot më konsideroni edhe mua anëtarin më të ri të ‘Europa Nostra’”, ia ka kthyer Meta.