Një burrë është burgosur dje për 20 vjet për një seri përdhunimesh dhe abuzimesh seksuale ndaj motrës së tij më të vogël dhe bijave të tij gjatë një periudhe 23 vjeçare.
James O’Reilly, tashme 75 vjeç, i kishte bërë vajzat e vogla objekt abuzimesh të tmerrshme seksuale si dhe keqtrajtime fizike, refuzim ushqimi dhe mënyra të tjera degradimi, u tha në gjyqin e tij në kryeqytetin irlandez Dublin.
Gjatë abuzimeve që ndodhën mes viteve 1977 e 2000, O’Reilly përdhunoi një nga bijat e tij, duke e lënë shtatzënë në 1988. Prandaj ai e këshilloi atë të thoshte se ishte përdhunuar nga dikush tjetër.
Ai vazhdoi të abuzonte me të dhe ndaloi vetëm kur ajo e kërcënoi me thikë. Testet e mëvonshme të ADN treguan se ai ishte babai, dhe kjo u përdor kundër tij në dhënien e dënimit.
Një nga viktimat tha se ishte lënë pa ngrënë dhe ishte detyruar të lypte për ushqim, ndërsa një tjetër tha se nuk e dinte çfarë ishin dhuratat e Krishtlindjes deri sa ishte bërë e rritur.
O’Reilly, nga Killeens, në Irlandë, u deklarua i pafajshëm për 81 akuzat e përdhunimit dhe sulmeve seksuale. Por në fillim të vitit ai ishte shpallur fajtor nga juria për 58 përdhunime e 9 sulme seksuale.
Prokurorja Caroline Biggs SC, tha se shtatë vajzat kishin kërkuar të drejtën e anonimatit pas emërimit të abuzuesit të tyre. Ato shiheshin që festonin jashtë gjykatës kur u dha dënimi për O’Reilly.
O’Reilly ishte rreth 34 vjeç kur abuzoi viktimën e tij të parë, motrën e tij 13 vjeçare.Pas disa vitesh ai nisi të abuzonte me bijën e tij, në kohën kur nëna e saj ishte në spital shtatzënë.
Në vitin 1977, kur bija e tij ishte rreth tetë vjeç ai e përdhunoi në një furgon dhe i tha se nëse tregonte, do ta dërgonte për adoptim. Në gjyq u tha se familja jetoi gjatë një periudhe në një shtëpi në Dublin, por më shumë në një karavan të tërhequr me kalë, e më vonë në një shtëpi lëvizëse më moderne.
