Një histori aspak e këndshme u ka ndodhur 3 profesionistëve të sporteve ujore, pasi u nisën për pushime, por pas 9 orësh sorrollatje nga autoritetet greke nuk u lejuan të shkelin në tokë dhe u kthyen sërish në brigjet italiane.
Mediat e Përtej Adriatikut shkruajnë se 3 profesionistët nga Salento u larguan nga porti Miggiano më 1 korrik me një varkë private, për një festë 4-ditore në ishujt grekë, por boshllëqet në legjislacion kishin komplikuar gjithçka, duke i detyruar tre pushuesit të ktheheshin në Salento para se të binte errësira. Ai që e denoncon këtë rast është njëri nga 3 shokët, mjeku nga Leçe me një të kaluar në politikën e qytetit, Silverio Bosco.
“Pas rihapjes së kufijve, siç e kishim organizuar prej ca kohësh me dy miqtë e mi, u nisëm për një udhëtim në det me një mjet lundrues privat për të mbërritur në një strukturë akomodimi në ishullin grek Erikoussa. Nga bregu i Salentos u nisëm rreth orës 10 të mëngjesit dhe e planifikuam udhëtimin në dy ndalesa. Pas rreth dy orësh lundrimi arritëm në plazhin e Kalipsosë, në ishullin Othoni”, tregon ai.
Më tej, mjeku vijon rrëfimin: “Atje, për habinë e të treve erdhi refuzimi i parë, kur ishim gati për të zbritur nga varka, por sapo dëgjuan të ishim italianë, nisën të ulërinin nga larg. Midis befasisë dhe hidhërimit ne u përpoqëm të bisedonim me autoritetet greke për t’u sqaruar, por gjithçka ishte e padobishme. Kështu që pas më shumë se një ore rifilluam udhëtimin drejt Erikoussas. Në këtë ishull ne kishim rezervuar hotelin tonë, por edhe aty u refuzuam dhe u detyruam të qëndrojmë në det. Asnjë ndihmë nuk na është ofruar, vetëm dyer në fytyrë. Në port, ata na mbajtën në një distancë të sigurtë. Nga këndvështrimi i tyre, ne nuk kishim autorizimet e nevojshme sepse arritëm në ujërat greke me mjet lundrues privat. Nuk na ndihmoi as ndërhyrja e menaxherëve të hotelit që konfirmonin rezervimin tonë atje. Në këtë pikë, pas 9 orësh pritje, zgjidhja ishte të riktheheshim në Salento, para se të errësohej. Një histori absurd dhe askush nuk ishte në gjendje ta sqaronte këtë ndalim dhe orët që kaluam atje”.
