Një ngjarje e rëndë ka ndodhur në Gjermani, ku një 49-vjeçar gjerman ka vrarë punëtorin e një karburanti, pasi ky i fundit refuzoi t’i shërbente pa vendosur maskën mbrojtëse.
Autoritetet në Trier, thanë se i dyshuari u ka thënë policëve se ka vepruar nga zemërimi, pasi arkëtari 20-vjeçar në një pikë karburanti i kërkoi që ta vendoste maskën.
I dyshuari hyri të shtunën në pompën “Aral” rreth orës 7 e 45 minuta në mbrëmje dhe mori një paketim me gjashtë birra. Nga pamjet e kamerave të sigurisë shihet se ai kishte maskë të vendosur në xhepin e pasmë të pantallonave.
Pasi arkëtari i kishte thënë dy herë se është e obligueshme që të vendoset maska përderisa ndodhet brenda lokalit, burri lëshoi birrat dhe u largua.
Ai u kthye dy orë më pas, kësaj radhe me maskë në fytyrë. “Ai nxori një pistoletë nga xhepi dhe e qëlloi një herë në mënyrë fatale studentin 20-vjeçar nga Idar-Obstein”, tha policia.
I dyshuari iku nga vendi i ngjarjes, por u dorëzua në polici mëngjesin e ardhshëm.