Prej më shumë se dy dekadave, asnjë aktivitet kriminal në kryeqytetin Italian, Romën, nuk ndodh pa dijeninë dhe konsensusin e një prej bandave më të njohura dhe të fuqishme të saj.
Behët fjalë për klanin e Casamonica, fisi me origjinë rome që nga rajoni i Abrucos ku merrej me tregtinë e kuajve dhe aktivitete të vogla të paligjshme u transferuan në Romë rreth viteve ’50 të shekullit të kaluar.
Të fuqizuar në vitet ‘70 falë bashkëpunimit mb Bandën e njohur të “Maglianës”, që i përdorte për punët e rëndomta por që i mundësoi kontakte me politikanë dhe sipërmarrës, klani Casamonica filloi të merrej fillimisht me huadhënie, dhe më pas me gjobëvënie ndaj aktiviteteve tregtare dhe trafikun e lëndëve narkotike.
Sot Casamonica kontrollojnë aktivitetet e pjesës jug-lindore të kryeqytetit italian, por interesat e tyre shtrihen edhe në vende të ndryshme europiane, falë bashkëpunimit me fiset e tjera rome si ai Spada, por duke u mbështetur edhe te kriminaliteti boshnjak dhe shqiptar.
Por sot një verdikt i rëndësishëm ka ardhur nga Gjykata e Romës, që ka dënuar me 400 vjet në total 14 anëtarë të bandës, duke i cilësuar si pjesë e një organizate mafioze, cilësim ky që pothuajse në mënyrë të pabesueshme, ende nuk ishte shprehur zyrtarisht për klanin.
Një goditje e rëndë për Casamonica, pas vdekjes në 2015 të bosit Vittorio Casamonica, i cili mbante në duart e tij fatet e familjes. Një pjesë e vilave luksoze dhe të arredimit ku sendet e lara në flori nuk numëroheshin dot, tashmë janë të prishura dhe të në sekuestro, dhe cilësimi si mafiozë do të vijojë në shpërbërjen e pasurisë së tyre.
