Diplomatët amerikanë kanë akuzuar sërish Rusinë se po përdor urinë si një tjetër armë ndaj Ukrainës. Shkak për këtë është bërë bllokimi i anijeve të cilat do të ngarkoheshin në portet e Ukrainës me grurë. Sasia e grurit do të shpërndahej në vende të ndryshme në mbarë botën.
Lidhur me këtë ka reaguar ambasadorja e SHBA në Ukrainë, Bridget A. Brink, e cila e konsideroi veprimin e Rusisë si tentativë për të përdorur urinë në favor të luftës.
Zyrtarja amerikane iu referua komenteve të ngjashme mbi temën e bërë nga Sekretari i Shtetit i SHBA Antony Blinken më herët.
“Bota nuk duhet t’i kujtojë Moskës çdo disa javë që të ndalojë përdorimin e urisë së njerëzve si një armë në luftën e saj kundër Ukrainës,” tha Blinken.
Farhan Haq, zëvendës zëdhënës i OKB-së për Sekretarin e Përgjithshëm, tha se dy inspektime të anijeve ndodhën të martën.
Lajmi vjen një ditë pasi OKB-ja tha se nuk kishte pasur inspektime të anijeve si pjesë e marrëveshjes së grurit për dy ditë. Ukraina akuzoi të hënën Rusinë për ndalimin efektiv të marrëveshjes së grurit duke mos inspektuar anijet.
