Organizata Botërore e Shëndetësisë u ka bërë thirrje vendeve që të mos marrin vendime të nxituara në kufizimet e udhëtimit, për shkak të variantit B.1.1.529 (i ashtuquajturi “mutacioni i Botsvanës”), duke theksuar se nevojitet një qasje shkencore e bazuar në vlerësimin e rrezikut.
“Për momentin, nuk është e rekomandueshme vendosja e kufizimeve të udhëtimit,”, tha Christian Lindmeier, duke folur në një konferencë për shtyp në Gjenevë.
Organizata Botërore e Shëndetësisë pritet të nxjerrë udhëzime të mëtejshme për masat që mund të merren, shtoi zëdhënësi. Do të duhen disa javë për të kuptuar ndikimin e variantit të ri të SARS-COV-2.
Studiuesit po punojnë për të kuptuar se sa ngjitës është varianti dhe nëse do të ketë efekt në trajtimet dhe vaksinat kundër Covid, tha një zëdhënës i Organizatës Botërore të Shëndetësisë.