![Biden për sulmet ndaj Izraelit: Një akt i pastër ligësie](https://www.vizionplus.tv/wp-content/uploads/2023/10/Capture-50-642x400.jpg)
Presidenti i Shteteve të Bashkuara, Joe Biden denoncoi të martën Hamasin dhe theksoi mbështetjen e SHBA-së për Izraelin ku mbi 1000 vetë përfshirë 14 amerikanë kanë humbur jetën, që kur filluan sulmet e Hamasit gjatë fundjavës.
Duke folur nga Shtëpia e Bardhë, Presidenti Biden shprehu gjithashtu shqetësim për amerikanët që janë marrë peng nga Hamasi, grupi militant që mbështetet nga Irani.
“Ka momente në jetë … kur një e keqe e paimagjinueshme godet botën. Populli i Izraelit jetoi një moment të tillë këtë fundjavë,” tha zoti Biden.
“Ky është një akt i pastër ligësie,” tha ai.
Presidenti Biden përshkroi ato që i quajti njoftime për veprime neveritëse për “prindër të vrarë”, “foshnja të vrara”, “familje të tëra të vrara” dhe “gra të përdhunuara”.
Ai tha se Hamasi ka kërcënuar se do të ekzekutojë pengje, përfshirë të mbijetuar të Holokaustit, duke shkelur “çdo kod të moralit njerëzor”.
Presidenti amerikan tha se brutaliteti dhe “etja për gjak” e grupit të kujton “tmerret më të mëdha të ISIS-it”.
“Ky është terrorizëm, por fatkeqësisht për popullin hebre, nuk është diçka e re,” tha zoti Biden.
Incidenti risolli në kujtesë antisemitizmin dhe gjenocidin ndaj popullit hebre, shtoi ai.
Në një referencë që dukej se drejtohej ndaj Iranit dhe grupeve të mbështetura nga Irani si Hezbollahu i Libanit, zoti Biden tha se ai kishte një mesazh për çdo vend apo organizatë që mund t’i shkonte ndër mend të përfitonte nga situata – “Mos e bëni!”
Presidenti Biden tha gjithashtu në fjalimin e tij se agjencitë e sigurisë në SHBA po ndërmarrin hapa për të parandaluar çdo kërcënim të mundshëm të brendshëm pas sulmit të fundjavës së grupit islamik palestinez Hamas ndaj Izraelit.
FBI tha më herët se po “monitoronte nga afër zhvillimet”, por shtoi se “nuk ka informacione konkrete dhe të besueshme zbulimi për ndonjë kërcënim në Shtetet e Bashkuara të lidhur me sulmet e Hamasit në Izrael”.
Zoti Biden foli pas telefonatës së tij të tretë në katër ditë me kryeministrin izraelit, Benjamin Netanyahu.
Ai përmendi ndihmën ushtarake që SHBA po dërgon për të ndihmuar Izraelin.
Presidenti Biden ofroi gjithashtu mbështetje për hebrenjtë amerikanë dhe tha se ata duhet të lejohen të udhtrojnë besimin e tyre në paqe në Shtetet e Bashkuara.
Zoti Biden tha muajin e kaluar se antisemitizmi në Shtetet e Bashkuara ishte rritur në nivele rekord.
Ambasada e Izraelit në Uashington tha se numri i të vdekurve nga sulmet e fundjavës së Hamasit është tani mbi 1000./voa