Tronditës dhe i pabesueshëm ka qenë lajmi i ndarjes nga jeta të Ismail Kadaresë për Piro Milkanin. Regjisori i dhjetëra filmave shqiptarë një pjesë e tyre si bashkëpunim me Kadarenë, tregon se shkrimtari shprehej se kishte dëshirë që të jetonte deri në moshën 90 vjeçare, ai e dinte që nuk ishte i pavdekshëm, por këtë dëshirë e kishte.
Milkani thotë se vepra e Kadaresë është trashëgimia më e vyer që i ka mbetur tashmë vendit, ndërsa shton se vitin e ardhshëm në festivalin Ballkanik të Filmit, 2 ditë të këtij edicioni do ja kushtojnë veprës së gjeniut të letrave Ismail Kadare.
Regjisori tregon se Kadarenë nuk mund ta takoje në çdo kohë, por sa herë e takonte shkonte në një restorant në Tiranë. Ai tregon edhe një rast të një filmi ku Kadare i kishte kërkuar të hiqte nga xhirimet disa vajza ruse, pasi i trembej faktit se shoqëria mund ta quante “donzhuan” ose “kazanova”.
Milkani e mbyll duke thënë se Kadare do ti mungojë, por thotë se boshllëkun do ja plotësojnë të gjitha veprat dhe vëllimet e tij të cilat e bëjnë të pavdekshëm mikun e tij prej 60 vitesh. /vizionplus.tv