Parku i ri i komunës së Tuzit në Malin e Zi u kthye në një pasarelë të madhe, ku këtë herë nuk ishte në qendër moda dhe tendencat e fundit, por shpalosja e vlerave e traditave të hershme të kombit përmes Xhubletës.
Aktiviteti “Xhubleta, dëshmitare e lashtësisë sonë” bëri bashkë figura të njohura të jetës publike të shqiptarisë, ndërsa vajzat dhe gratë malësore parakaluan me veshjen tradicionale.
Komuna shqiptare e Tuzit e ka shpallur vitin 2023 si vitin e xhubletës.
Për herë parë, edhe posta e Malit të Zi do të lëshojë në përdorim pullën postare me elemente shqiptare, pikërisht me xhubletën dhe me shënimin “Viti i Xhubletës”.
Në fund u nderua me titullin “Qytetar nderi i komunës së Tuzit”, 90-vjeçarja Tole Berishaj, për kontributin e saj të rëndësishëm në ruajtjen e traditës përmes punimit të veshjes kombëtare, Xhubletës.
