![“Kadare ishte një shpirt i lirë”, presidenti francez mesazh për ndarjen nga jeta të shkrimtarit](https://www.vizionplus.tv/wp-content/uploads/2024/07/Capture-5-719x400.png)
Presidenti francez, Emanuel Macron përmes një mesazhi të ndjerë kujtoi shkrimtarin e madh Ismail Kadare i cili u nda nga jeta një ditë më parë. Kreu i Elizesë tha se gjeniu i letrave shqipe ishte një shpirt i lirë, i cili mori pjesë në zgjimin e madh të popullit shqiptar.
“Këtë të hënë vdiq një shkrimtar i cili mishëroi, me jetën, me veprën dhe me personalitetin e tij, pasurimin e dialogut, forcën e shpirtit europian dhe vokacionin mikpritës të Francës. Është larguar nga ne shkrimtari franko-shqiptar Ismail Kadare. Ai ishte një nga ata për të cilët shkrimi është një luftë; atyre që çdo fjalë e tyre është shkëputur nga heshtja. Jetoi dhe krijoi si njeri i lirë, në një vend që nuk ishte: Shqipëria Sovjetike e pasluftës, nën udhëheqjen e hekurt të Enver Hoxhës. Por zbulimi i letërsisë hapi brigjet e një bote të re për të. Ai forcoi rezistencën e tij intelektuale”, shprehet Macron.
Presidenti Macron kujtoi largimin e Ismail Kadarese drejt Francës, duke e vlerësuar si nderim zgjedhjen e vendit të tij nga shkrimtari.
“Pas Pallatit të Ëndrrave, në vitin 1981, ra sëpata: “armik i popullit”. I ndaluar nga publikimi, ai vendosi të kërkojë azil politik. Kështu ai iu drejtua vendit që kishte qenë i pari që përktheu librat e tij, i pari që u bë i apasionuar pas punës së tij përtej kufijve të tij. Me botuesin e tij, Claude Durand, ai planifikoi një arratisje të madhe në Francë në vitin 1990, një tjetër goditje në murin e diktaturës: në Tiranë, largimi i tij çoi në protestat e para studentore në më shumë se dyzet vjet.”, tha Macron.
Ndër dhjetëra çmime që kanë nderuar Kadarenë eshte edhe dekorata e fundit “Oficeri i Madh i Legjionit të Nderit” më 16 tetor të vitit 2023 nga presidenti i Francës Emmanuel Macron gjatë një ceremonie në Tiranë.
Ndërkohë pas vendimit të qeverisë shqiptare për të shpallur dy ditë zie kombëtare në shenjë nderimi për ndarjen nga jeta të kolosit të letërsisë shqipe, ka reaguar edhe Kosova, ku presidentja osmani njofton uljen e flamujve në gjysmështizë.
Homazhet dhe ceremonia shtetërore do të organizohen në mjediset e teatrit Kombëtar të Operas dhe Baletit ditën e mërkurë, përkatësisht, nga ora 9:00 deri në orën 11:00, dhe nga ora 11:30 deri në orën 12:30./vizionplus.tv