“Greqia, një histori e përmbledhur”, tashmë flet shqip duke i dhënë mundësinë lexuesit shqiptar të ketë një qasje të ilustruar në historinë e vendit fqinj.
Përkthimi në shqip i librit të historianit të njohur britanik, Riçard Klog u prezantua në praninë e akademikëve, profesorëve dhe studentëve të fushës ndërsa sugjerimi i autorit i adresohet të gjithëve pa përjashtim.
“Në periudha të caktuara marëdhëniet mes Shqipërisë dhe Greqisë kanë qënë të vështira dhe njohja reciproke e historisë së të dyja vendeve është e rëndësishme për botën moderne dhe demokracinë që kanë ndërtuar. Greqia është një fqinj shumë i rëndësishëm për Shqipërinë.”
Ambasadorja greke në Shqipëri, Konstantina Kamitsi nënvizoi se tashmë ky libër është përkthyer në të gjitha gjuhët e Ballkanit dhe ofron një këndvështrim të vlefshëm bashkëpunimi mes popujve.
“Duke ofruar një këndvështrim të saktë dhe shterues të historisë së shkuar dhe zhvillimeve të ditëve të sotme, ky libër është një mundësi shumë e mirë për publikun shqiptar që të njohë më mirë Greqinë. Projekte të tilla kontribupjnë drejtpërdrejt në të kuptuarit më të mirë dhe bahkëpunimin mes njëri tjetrit.”
Historiani Riçard Klog, e ka konceptuar librin “Greqia, një histori e përmbledhur” duke nisur që nga lëvizjet e para të lëvizjes kombëtare në fund të shekullit të tetëmbëdhjetë e deri në ditët e sotme. Ai parashtron analiza të zhvillimeve bashkëkohore politike, ekonomike dhe sociale ndërsa përfshin ilustrime shtesë, së bashku me tabela dhe sugjerime për lexim të mëtejshëm./vizionplus.tv/