Analisti Fatos Lubonja tha se në Shqipëri është e vështirë të fitohen zgjedhjet nga opozita pa një ndryshim radikal. Lubonja shprehet se ky është një regjim që nuk rrëzohet në forma institucionale.
Sa i përket situatës në PD, ai tha se Basha nuk ka qenë i influencuar nga Berisha kur doli nga parlamenti apo krijoi çadrën, por se dobësia e tij është se nuk ka krijuar një parti me mbështetje të madhe popullore.
“Mendoj se theksi mund të vihet tek ajo që “pse është i dobët Basha”. Unë nuk mendoj që dobësia e Bashës vjen ngaqë humbi zgjedhjet. Ashtu si kanë ardhur punët në Shqipëri është vështirë të fitohen zgjedhjet pa një ndryshim radikal. Unë mendoj që ky është një regjim që nuk rrëzohet në forma institucionale. Është një regjim që i afrohet Kirgistanit.
Basha ka një problem shumë të madh që është përqafimi i çdo opsioni që ai i duket i suksesshëm dhe nuk mendoj që është influencuar thjesht nga Berisha, kur doli nga parlamenti, apo krijoi çadrën. Nuk mendoj se ka qenë Berisha. Ato zgjidhje kanë qenë zgjidhje që kishin një lloj sensi për të treguar që Shqipëria është një vend jo normal, dobësia është që nuk ka krijuar dot një parti me mbështetje të madhe popullore, por kishte militantët që i mundte policia e Sandër Lleshit me gaz dhe iknin.
Basha ka bërë këtë zgjidhje radikale dikur dhe pasi pëson masakrën që ishte kështu më 25 prill, në një mënyrë të çuditshëm e shohim që kthehet i urtë dhe i butë, thotë do hyjmë në parlament, do i bindemi amerikanëve dhe kthehet në një mënyrë krejtësisht artificiale duke hequr dhe Berishën e duke dobësuar pozitën e tij.
Është një shenjë dobësie që ka krijuar opinionin që ky është i dorëzuar. Ka bërë një zgjedhje që e ka ndarë nga populli demokrat dhe tani e shohim që del me Yuri Kim, me ca senatorë, a thua se do fitojë. Ndërkohë që militantët demokratë që edhe ky opsioni që duhet të jemi me Amerikën, nuk është se i ka trembur shumë.
Në këtë sens ky njeri çfarë rrezatimi jep, kur kërkohet. Ai trusti i madh që është trusti i Ramës që ka aksionet kryesore, ky duket sikur ka ca aksione sekondare që gati-gati i ka shitur, por nuk jep asnjë shpresë për ndryshim të situatës në Shqipëri”, – tha Lubonja në emisionin “Real Story” në News24.
