Në kuadër të aktiviteteve të vazhdueshme që kanë filluar në dhjetor të vitit të kaluar, lidhur me parandalimin dhe shuarjen e kërcënimeve terroriste, dje nën udhëheqjen e një prokurori publik kompetent nga Prokuroria Themelore Publike për Prokurorinë e Krimit të Organizuar dhe Korrupsionit, u krye aksioni i koordinuar i Agjencisë së Sigurisë Kombëtare dhe departamenteve për shuarjen e krimit të organizuar dhe të rëndë dhe për operacione speciale policore në kuadër të Ministrisë së Brendshme.
Janë kryer bastisje në pesë lokacione në Shkup dhe Gostivar, përfshirë një shtëpi dhe objekte tjera, gjatë të cilave janë gjetur dhe konfiskuar një pushkë automatike, një pistoletë, material propagandistik, telefona, pajisje kompjuterike dhe sende të tjera që do t’i nënshtrohen ekspertizës së mëtutjeshme mjeko-ligjore.
Nga ky aksion policor janë ndaluar katër persona.
Aksioni është rezultat i veprimeve të kryera nga Laboratori i Forenzikës Digjitale pranë Prokurorisë Themelore Publike për Ndjekjen e Krimit të Organizuar dhe Korrupsionit, ku u zbuluan disa grupe në rrjetin social “Telegram”, në të cilat të dyshuarit ndanin materiale propaganduese të blerë dhe përkthyer më parë të ISIS-it dhe kanë rekrutuar anëtarë të rinj.
Prokurori kompetent, duke vepruar sipas kallëzimit penal, ka lëshuar urdhër për zhvillimin e procedurës hetimore ndaj këtyre personave për të cilët ekziston dyshimi se kanë kryer veprën penale “organizatë terroriste”.
Duke pasur parasysh se janë plotësuar kushtet ligjore, prokurori publik në fjalë ka paraqitur propozime te gjyqtari i procedurës paraprake në Gjykatën Themelore Penale në Shkup për caktimin e masës së paraburgimit ndaj të gjithë të dyshuarve. Gjykatësi e ka pranuar propozimin dhe të dyshuarve ua ka caktuar masën e paraburgimit prej 30 ditësh./Telegrafi/
The post Bastisje në Shkup dhe Gostivar, katër persona dyshohen për veprën “organizatë terroriste” appeared first on Telegrafi.
