Gjatë gjykimit për vrasjen e dyfishtë të 14-vjeçares Vanja Gjorçevska dhe pensionistit Pançe Zhezovski, dëshmoi edhe shefi i Njësisë për krime të dhunshme, Dejan Dimovski. Në dëshminë e tij, ai zbuloi se gjatë hetimeve janë ndjekur disa teori të ndryshme, njëra prej të cilave bazohej në informacionin e dhënë nga prindërit e Vanjas, përcjell Telegrafi Maqedoni.
“Ne po punonim në teori të ndryshme nga prindërit dhe njëra prej tyre ishte e lidhur me të dashurin e saj virtual nga Suedia”, tha Dimovski.
Sipas tij, Vanja ka komunikuar me një djalë në internet, ata kanë folur në anglisht dhe detajet që kanë zbuluar në profilin e tij kanë shqetësuar hetuesit.
“Ne kontrolluam profilin dhe vumë re se në faqen e tij kishte flamuj të lidhur me ISIS. Kjo e bëri rastin edhe më serioz dhe ne menjëherë përfshimë kolegë nga departamentet e tjera për të kontrolluar atë kërcënim të mundshëm”, shtoi ai.
U kryen kontrolle të gjera, duke përfshirë bashkëpunimin me autoritetet suedeze, si dhe kontrolle kufitare, por hetimi nuk rezultoi në gjetje konkrete.
“Fatkeqësisht, të gjitha kontrollet dolën negative dhe kjo gjurmë nuk çoi askund. Ne humbëm dy ditë duke punuar në këtë teori”, dëshmoi Dimovski, duke shpjeguar se policia është dashur të konfiskojë telefona dhe kompjuterë për analiza të hollësishme, e cila ka zgjatur disa ditë./Telegrafi/
The post Dimovski: Janë humbur dy ditë duke kontrolluar një djalë nga Suedia, me të cilin Vanja komunikonte në internet appeared first on Telegrafi.
