Presidenti dhe CEO i Microsoft , Satya Nadella, bëri deklaratën e tij të parë të premten pasdite në lidhje me ndërprerjen globale të shkaktuar në sistemet elektronike që funksionojnë me Windows, pas një përmirësimi të softuerit nga kompania e sigurisë kibernetike Crowdstrike.
“Dje, CrowdStrike lëshoi një përditësim që filloi të prekë sistemet e IT në mbarë botën,” shkroi Satya Nadella në X, duke shtuar, “Ne jemi të vetëdijshëm për këtë çështje dhe po punojmë me CrowdStrike dhe në të gjithë industrinë për t’u ofruar klientëve udhëzime teknike dhe mbështetje për të rivendosur dhe funksionin në sistemet e tyre.”
Aeroportet, rrjetet e transportit, kompanitë dhe mediat në shumë vende të botës janë përballur me probleme serioze që në mëngjes pas “qarkut të shkurtër” dixhital.
Më shumë se 1000 fluturime janë anuluar sot në mbarë botën, sipas firmës analitike të aviacionit Cirium.
Sipas zyrtarëve, linja e emergjencës 911 në shtetin amerikan të Alaskës “u rrëzua”. Me probleme u përballën edhe shërbimet e Bursës së Londrës, ndërsa platforma elektronike e takimit me pacientët e Sistemit Shëndetësor Britanik “ra”.
Raportime për probleme janë bërë në mbarë botën në shumë rajone të botës, si në disa vende evropiane, por edhe në Indi, SHBA, Australi dhe Zelandën e Re.
Crowdstrike gjithashtu ia atribuoi përplasjen një përditësimi të gabuar të softuerit. /vizionplus.tv
