Ministri izraelit i financave, Bezalel Smotrich, deklaroi se do të ishte një gabim i madh të ndalohej në këtë fazë operacioni ushtarak izraelit në Rripin e Gazës .
Smotrich, kreu i një partie të ekstremit të djathtë që favorizon zgjerimin e vendbanimeve hebraike dhe është pjesë e koalicionit qeverisës nën Benjamin Netanyahu, shkroi në X: “Hamasi po shkatërrohet dhe po lutet për një armëpushim. Tani është koha për të mbytur armikun derisa ta shtypim dhe shkatërrojmë atë. Do të jetë marrëzi nëse ndalemi tani, pak para fundit, dhe e lejojmë atë të shërohet dhe të na luftojë përsëri”.
Njoftimi erdhi ndërsa zyrtarët izraelitë vazhdojnë bisedimet e ndërmjetësuara për të arritur një marrëveshje armëpushimi me Hamasin.
Rrjeti televiziv izraelit Channel 7 raportoi sot se kreu i shërbimit të sigurisë së brendshme të Izraelit, Ronen Barr, fluturoi në Egjipt për të marrë pjesë në bisedime.
Hamasi njoftoi dje të dielën se pranon të negociojë fatin e pengjeve dhe lirimin e të burgosurve palestinezë në mungesë të një armëpushimi të përhershëm.
