Kryeministri i Japonisë, Fumio Kishida, është sulmuar me një granatë tymuese, përpara se të mbante një fjalim në rajonin perëndimor të Japonisë.
Kreu i qeverisë Japoneze u evakuua menjëherë nga punonjësit e sigurisë i padëmtuar, ndërsa autori i dyshuar i ngjarjes u vu në pranga në vendin e ngjarjes.
Pamjet e publikuara në rrjetet sociale tregojnë forcat e policisë që neutralizojnë autorin, ndërsa nuk janë dhënë detaje për identitetin tij apo motivin e ngjarjes.
Dëshmitarët treguan se panë fillimisht një objekt që fluturonte në ajër, i cili shpërtheu me një zhurmë të fortë e lëshoi një shtëllungë të madhe tymi.
Kishida po vizitonte portin në këtë rajon, për të mbështetur kandidatin e partisë së tij në pushtet, në zgjedhjet lokale që do të mbahen në fund të këtij muaji.
Incidenti vjen vetëm nëntë muaj pasi ish-kryeministri, Shinzo Abe, u vra me armë zjarri, teksa mbante një fjalim fushate në qytetin perëndimor Nara. Vrasja e tij tronditi kombin dhe nxiti përforcimin e masave të sigurisë për politikanët e Japonisë.
