Një dron amerikan pa pilot u godit nga një avion luftarak rus, mbi Detin e Zi. Ngjarja ndodhi të martën, teksa droni amerikan ishte në një mision rutinë, në hapësirën ajrore ndërkombëtare.
Pas incidentit, një ushtarak i Shteteve të Bashkuara tha se pas goditjes në helikë, droni amerikan u rrëzua mbi sipërfaqen e ujit, teksa akuzoi Moskën, duke u shprehur se veprimi ishte i pamatur.
“Droni ynë MQ-9 po kryente operacione rutinë në hapësirën ajrore ndërkombëtare kur u godit nga një avion rus, duke rezultuar në përplasje dhe humbje të plotë të dronit. Kjo manovër ishte e pamatur, e pasigurt dhe joprofesionale.”
Nga ana tjetër, ambasadori rus në SHBA, i cili u thirr nga Departamenti Amerikan i Shtetit, mohoi të ketë patur kontakt mes avionit rus dhe atij amerikan, ndërsa u shpreh se akuzat e Uashingtonit për incidentin, janë një provokim.
“Aktiviteti i papranueshëm i ushtrisë amerikane në afërsi të kufijve tanë është një shkak për shqetësim. Ne nuk duam asnjë konfrontim midis SHBA-së dhe Federatës Ruse. Ne jemi në favor të marrëdhënieve pragmatike për interesin e popullit amerikan dhe rus”
Ky incident është rasti i parë që shënon një përplasje të drejtpërdrejtë mes SHBA dhe Rusisë, që nga nisja e luftës në Ukrainë, më shumë se një vit më parë, dhe ka të ngjarë të rrisë tensionet midis dy kombeve.
