Në Gjykatën Penale në Shkup sot do të shpallet aktgjykimi për rastin “Talir 2”, në të cilin akuzohen ish-kryeministri i Maqedonisë, Nikolla Gruevski, i cili është në arrati dhe ish-sekretari i përgjithshëm i Qeverisë dhe OBRM-PDUKM-së, Kiril Bozhinovski.
Gjyqi do të zhvillohet në Shkup në ora 12:30.
Të pandehurit akuzohen për keqpërdorim të detyrës zyrtare, e cila i mundësoi personit juridik “AD Beton” nga Shkupi, të ndërtojë selinë e partisë politike OBRM-PDUKM, në kohën kur kompania kishte lidhur kontrata për prokurim publik me organet shtetërore dhe institucionet publike, në kundërshtim me Ligjin për partitë politike, Ligjin për financimin e partive politike dhe Ligjin për detyrimet.
Rastin e trajton gjyqtarja Daniela Aleksovska Stojanovska, ndërsa prokurorinë e përfaqëson prokurori publik Ljubomir Lape.
Shqyrtimi kryesor për rastin përfundoi dje me fjalën përfundimtare të të akuzuarit të dytë në rastin “Talir 2” Kiril Bozhinovski i cili kritikoi Gjykatën Themelore Penale në Shkup se gjatë gjykimit për këtë rast, janë shkelur të drejtat e tij.
Ai mohoi se është pajtuar apo ka zhvilluar negociata me “AD Beton” për ndërtimin e selisë së OBRM-PDUKM-së dhe theksoi se provat e paraqitura nga Prokuroria nuk e mbështesin akuzën.
Më herët, avokati Goran Karkinski, i cili është caktuar sipas detyrës zyrtare për të mbrojtur të pandehurin e parë Nikolla Gruevski, tha se Prokuroria gjatë gjykimit nuk ka paraqitur asnjë provë apo dëshmitar për atë për çka e akuzon Gruevskin.
The post Maqedoni: Sot shpallet aktgjykimi për rastin “Talir 2” ku akuzohet dhe ish-kryeministri Nikolla Gruevski appeared first on Telegrafi.
