Një atentat me armë zjarri i është bërë këtë të martë në Vlorë ish anëtarit të bandës së tritolit, Marjon Mitro.
Ai u qëllua nga një makinë në lëvizje pranë lagjes “29 nëntori”. Nga të shtënat, 49-vjeçari mbeti i plagosur ndërsa autorët u larguan me shpejtësi nga vendngjarja.
Mitro u paraqit vet në spital për ndihmë mjekësore ku mësohet se është jashtë rrezikut për jetën.
Ngjarja dyshohet të ketë ardhur si rrjedhojë e të shkuarës kriminale të 49-vjeçarit. Marjon Mitro ka qenë pjesë e dosjes së “bandes se tritolit” që drejtohej nga vrasësi me pagesë Julian Sinanaj. Ai u dënua nga gjykata me 19 vite burg pasi dyshohet se ka porositur atentatin e mbetur në tentativë ndaj ish-prefektit të Vlorës, Besnik Dervishi.
49-vjeçari Marjon Mitro u arrestua më 27 janar të vitit 2014, ndërsa u lirua nga burgu një vit më parë në rrethana ende të paqarta.
Ndërkohë policia ka sekuestruar kamerat e sigurisë me qëllim identifikimin e autorëve, ndërsa ka gjetur një makinë të djegur në aksin rrugor Vlorë-Selenicë. Automjeti dyshohet se i përket autorëve.
